Basketbol Puro Na Lang Basketbol

Bansot

Marami na pong mga kababayan natin na nagpapasya na kalimutan na po natin ang larong basketbol sa kadahilang wala naman daw tayong pag-asa sa larong ito dahil po mga bansot naman daw po tayo.

Tama naman po talaga sila, ngunit hindi lang naman dahil matangkad na ay sapat na ito para manalo. Malaking kalamangan po ito lalo na po sa mga larong basketbol, ngunit totoo rin po ito kahit sa putbol at balibol, samakatuwid po ba huwag na rin po ba tayong maglaro nito?

Hindi po, sa dahilang marami rin pong ibang bansa na sadyang maliliit rin ang mga manlalaro pero nagiging world class naman po sila sa putbol at balibol.

At kahit din po sa basketbol, kagaya po ng Japan, kahit din po Brazil at Argentina na hindi naman katangkaran ang mga manlalaro ngunit dahil po sa mayroon silang magandang programa at matagal na pong panahon magkakasama ang mga manlalaro po nila, ay mayroon po silang mga foreign trainers at coaches, nakaka sungkit rin po sila ng mga medalya kahit po maliliit sila kumpara sa mga kalaban nila.

Ang bansang Hapon po, kahit po Korea, magaganda po ang programa at coaching at mayroon din pong mga naturalized player (lahat naman po halos mayroon naturalized players, hindi lamang Pilipinas). Maganda po ang ball movement nila, mga set plays at outside shooting. Kayang kaya rin po natin yan, ngunit po dahil sa kayabangan, katangahan, negosyo, politika at talangka mentality, ayan po mas magagaling na po sa atin ang mga bansang ito.

Baseball, Softball

Sang ayon po ako, mas may pag asa po tayo sa mga larong baseball, softball, ngunit kailangan rin po natin lahat ng kailangan nating gawin at mas matagal na panahon pa rin po and kailangan bago po tayo maka abot kahit sa Top 50, kahit po Top 100 sa mundo.

Top 32

Sa basketbol po, pasok pa rin po tayo sa Top 32, at ito pa rin po ang pinamalaking tsansa natin sa Team Sports sa panahong ito. Lalo na po sa FIBA World Championship na gaganapin sa Pilipinas, Indonesia at Japan sa taong 2023.

May apat na taon pa po, kung ibibigay po natin ang suporta sa ating pambansang koponan, maaari pong maganda ang kalalabasan nito.

Kung hindi naman po, mag baseball, football at volleyball na lang po tayo.

Rowing puwede rin po.

Ang pinag uusapan po natin ay team sports, yung mga sport na pang isang tao lamang o may weight division, may pag asa po talaga tayo diyan, kasama na po dito ang boxing, martial arts, chess, bowling, billiards, golf, tennis, archery, shooting, weight lifting at marami pa pong iba.

Basketbol

Kagilagilalas o Kahiyahiya?

FIBA World

Nakarating na naman po ang ating pambansanag koponan ng basketbol sa World Championship ng FIBA ngayong taon na ginanap sa Tsina.

Ngunit kagaya po ng nakita natin sa Team USA, hindi rin po tayo nagtagumpay.

Hindi naman po mataas ang ating hinahangad, dahil po talaga po magagaling po ang mga kalaban.

Ang makasama lamang sa FIBA World ay isang malaking tagumpay at karangalan na hindi na maiaalis sa inang bayan. Napakarami pong bansa sa mundo na ni minsan ay hindi na nakaabot sa FIBA World Cup.

Kulelat

At hindi naman po masama na kulelat po tayo dahilan po sa ang mga nakapasok po dito ay pawang mga Top 32 lamang po sa buong mundo. At tayo nga lang po ang tanging nagtataas ng bandila ng mga taga Timog Silangang Asya at ng mga lahing hindi matatangkad.

Ang Pilipinas po ay nasa ika 31 sa buong mundo, samakatuwid, hanggang dito lamang po talaga tayo at ang ating inaasahan ay makapanalo lamang tayo ng isa.

Suwerte

At muntik na po tayong suwertehin kontra sa bansang Angola. Ngunit sa huli, natalo pa rin po tayo sa overtime. (Kung nanalo tayo sa larong ito, pasok sana po tayo sa 2020 Olympics).

Hindi Na Po Puwede

Sa susunod pong FIBA World Championships, sa Pilipinas po gaganapin.

Naku po, itigil na po natin ang paggaya sa istilo ng NBA. Hindi na po uubra ito. Hindi na po puwede ang basta pa All Star selection at pa Dream Team effect.

Kung NBA na nga di na umobra, tayo pang mga feeling NBA lamang.

Alam po natin na noong unang panahon, tayo po ang NBA sa buong Asya. Ngayon po ay hindi na po. NBA na lang po tayo ng Southeast Asia, at ilang panahon pa ay maabutan na rin po nila tayo. NBA kagaya ng PBA ay pera pera lang po.

Papogi

Hindi na po puwede ang puro porma, yabang at papogi. At bawal na rin po ang init ng ulo.

Hindi na po puwedeng ilang linggo lamang po ang praktis.

Hindi na rin po puwedeng hindi sasali ang mga pinakamahuhusay na manlalaro, dahil naglalaro po sila sa ligang propesyonal at ayaw po magka-injury o dahilan sa politika. Bakit nga ba hindi tayo maka alis alis sa lintik na politika?

Buwakaw

Hindi na po puwede ang feeling MJ o feeling Kobe.

Hindi na po puwedeng walang magaling na coach, walang mga play, walang scouting at programa.

Dahil bakit po noong panahon ni Caloy Loyzaga, tatlong taon po ang programa at nagka bronze po tayo sa FIBA World (isang talo lang po tayo).

Sa panahong po ng Northern Cement at Coach Ron Jacobs, ilang taon po ang kanilang programa, at naka abot din tayo sa FIBA World Championship.

2023

Ngayon po, may apat na taon po tayo para pag handaan ang FIBA World 2023 sa ating bansa.

Ano kaya ang ating gagawin?

Sino kaya ang kikilos?

Sadya po bang wala nang hiya ang mga taga SBP, PBA at mga tagapamahala ng sports sa bansa?

Alam naman po natin na basketbol pa rin ang pambansang laro ng Pilipinas.

Online Keyboard Warriors

Sa ating pong magigiting na mandirigma sa internet, hinay hinay sa kayabangan, malaking kahihiyan po ang mga sinasabi ninyo sa online community.

At sa ating pong mga kababayang talangka, naku po, kaya po hindi umuunlad ang Pilipinas, kasama po kayo sa mga dahilan.

Bakit nga po mga Pilipino kung di sala sa init, sala naman sa lamig.

Proud to be Pinoy, kapag panalo, Kapag talo naman, grabe parang may alam sa basketbol.

Tayo'y Mga Pilipino

Suportahan po natin ang ating pambansang koponan, dahil po tayo ay mga Pilipino... para po ito sa Inang Bayan, magkaisa po tayo kahit lamang sa larangan ng basketbol.

Lahat po ng ibang bansa suportado po nila ang kanilang sariling koponan. Bawal po mga talangka sa kanila.

Kasubuan na po, tayo po ay isa sa mga host nations ng 2023 FIBA World, at pagkakataon na rin po na maipakita natin ang Pilipinas at ang pagkakaisa ng mga Pilipino sa buong mundo.

Bumibili Ka Ba O Nagbebenta ng Boto?

Huwag na po tayong magtanga tangahan, ilang dekada na pong alam ng nakararami na meron po talagang bumibili at nagbebenta ng mga boto.

Ang tanong, isa ka ba sa kanilang hanay? Nakikinabang ka ba sa panandaliang sarap habang ilang taon pong magnanakaw at walang gagawing matino ang ibinoto ninyo?

Marahil po dala ng pananakot, kahirapan, o kawalan na ng tiwala na mababago pa ang bulok na sistema sa inang bayan.

O baka naman hanap buhay na po talaga ninyo yan, dahil po sa kadahilanang magkakaposisyon po kayo o makikinabang kapag nahalal ang kandidato ninyo.

Kung ano man ang kadahilanan ninyo, utang na loob naman po, huwag na po natin iboto ang mga talamak nang magnanakaw ng kaban ng bayan.

At huwag na po tayong madala ng sample ballot ng ating mga obispo, pastor o iglesia na alam naman nating nabili na ng mga politiko.

Sila po at kayo ang tunay na salot at kadahilanan ng patuloy na kabulukan ng sistema sa ating bayan.

Nakakahiya naman po sa inyong mga anak, mga apo, at sa mga susunod pang salinlahi ng inyong angkan.

Magkano po ba ang halaga ng inyong dangal?

Sa Mga Nagmomotor

Hit and Run

Naparami na pong nakapanood ng videong ito at huwag na po nating ipakita yung parte ng impact.

Ngunit dapat po natin itong talakayin at pagnilay nilayan.

Malaking pasasalamat sa nagbigay ng dash cam video dahil malaking tulong po ito sa mga imbestigador.

Namatay na po ang isang biktima at sumuko na po sa pulis ang driver ng sasakyan.

Sana po ay maging malaking aral po ito sa ating lahat.

Tandaan

Ibayong pag-iingat po ang kailangan sa kalsada.

Sa mga driver ng sasakyan, huwag pong masyadong mayabang at mainit ang ulo. At huwag pong gagawa ng mga bagay na pagsisihan nyo sa bandang huli.

Sa mga driver po ng motorsiklo at sa mga angkas, mas lalo pong ibayong pag-iingat ang kailangan at huwag din po magpadala sa emosyon. Wala pong kalaban laban ang motor sa mga sasakyan, kaya kung makakaiwas po sa digrasya, kayo na po ang magbigay.

Sa driver po ng sasakyan ito, mabuti naman at sumuko ka na.

Para Sa Mga Mareklamo

LRT Wikimedia Commons, Wieralee

Huwag sana tayo maging mangmang sa kalagayan ng mga ibang tao sa ibang bansa para hindi naman puro reklamo na lamang ang past time natin.

Kasi naman po, maraming mga kababayan naman natin ang alam lamang ay magreklamo.

Kagaya ng mga nagrereklamong marumi ang kapaligiran. Ngunit sila naman ang walang pakundangan kung makalat ng kanilang basura kung saan saan.

Yung iba, reklamo nang reklamo sa trapiko. Ngunit sila naman ang pawang walang disiplina pagdating sa kalsada.

At yung iba reklamo nang reklamo sa LRT o MRT. Siyempre naman, kasi naka asar naman po talaga.

Ngunit karamihan sa mga mareklamo nating kababayan, sa malamang hindi pa nakakarating sa mga ibang malalaking siyudad sa mga ibang bansa.

Minsan din, kailangan namang makita ang kalagayan sa ibang bansa, para malaman na medyo masuwerte pa rin pala sila kumpara sa iba.

O, eto sakay ka na. At subukan mo kayang bumaba kapag estasyon mo na.

O sige bukas, pagsakay mo sa LRT medyo matatanggap mo na nang kaunti ang pagbiyahe mo. Oo, wala na talagang sarahan ng pinto.

Ano Ba Yan?

Maynila, bakit naman kasi pinaupo nyo pa yan sa puwesto?

Sa maraming bansa, kapag may bahid ng scandal o kahit maliit na kaso ng pandarambong, kusa ng humihingi ng tawad sa publiko ang mga nakapuwesto kasi nga nasira na nila ang "public trust" at ito ay isang malaking kahihiyan sa kanilang pangalan, pamilya at sa mga nagtiwalang bumoto sa kanila. Kasunod nito ay ang kaagad agad nang pagbaba o pagresign sa puwesto.

Bakit Kaya Sa Atin?

Nakupo naman sa atin, naakusahan na, nahatulan na, nakulong na, nakakatakbo pang mayor, gobernor, congresista, senador, presidente at kung ano ano pa.

Nananalo pa... at kung umasta, parang wala lang... anyare?

Sadya po ba silang wala nang hiya o sadya po talagang bulag, pipi, bingi at tanga ang mga bumoboto?

Bayan, gising po. Ibenenta nyo na po bang lahat ang inyong prinsipyo, delikadeza, katinuan at sentido comon, o sadyang wala kayo nyan?

Dumilat na po kayo at bumangon sa inyong matagal na pagbubulag-bulagan, pagbibingi-bingihan at pagtatanga-tangahan.

Sige po iboto pa ang mga actions stars - Erap, Jinggoy, Bong at iba pang politikong matagal nang napatunayang mayroong mga anomalya.

Kung hei fat choy po sa kanila at patuloy po ang pag asenso at pagyaman nila. Tayo pong lahat, patuloy po sa pag dil dil ng asin. Bakit po kaya?

Salaula

Basura

May kasabihan tayo na ang sabi ay "basurang tinapon mo, babalik rin sa iyo."

Luneta, pagkatapos ng Pasko 2018

At nakupo naman, sa mga basurang itinapon nating lahat, salaulang salaula na ang ating bayang tinubuan, at naging basura na po ang halos lahat ng bagay sa ating lipunan.

Parang wala na po tayong pag-asa. Ngunit yan ang gustong mangyari ng mga walang kuwentang tao, ang magkaroon ng walang pag-asa ang mga mamayan at maging wala nang pakialam ang lahat sa sariling bayan at sa lahat ng bagay.

Pagkatapos ng Traslacion 2019

Ngunit mali po. Lagi pong mayroong pag asa, kung unti unti pong mabubuksan ang mata nating lahat.

Gumising na po tayo. Magkaroon naman po tayo ng kahihiyan. Magkaroon naman po ng tunay na disiplina at kaayusan. At bukod sa lahat gamitin naman po ang utak. Wala pong personal na asenso at asenso ng bayan kung hindi po mag uumpisa sa bawat isa.

Manila Bay, poso negro ng Maynila

Tama na po ang basura. Tama na po ang trapo. Tama na po ang pagboto sa mga basura. Tama na po ang katangahan. Tama na po ang katamaran. At tama na po ang mga palusot.

Ang problema ng isa, ang problema ng bayan, ay problema ng lahat ng mamamayan.

Gising sambayanang Pilipino. Umaalingasaw na po tayong lahat.